කාන්තා ක්‍රිකට් ක්‍රීඩාව කෙරෙහි වෙනදාට වඩා උනන්දුවක් බොහෝ දෙනා තුළ ජනිත වී තිබෙන බව නොරහසක්. එබැවින් ශ්‍රී ලංකා ක්‍රිකට් ආයතනය එහි ගුණාත්මක භාවය වැඩි දියුණු කර ගැනීම සදහා ලබා දෙනු ලබන්නේ විශේෂ අවධානයක්.
අන්තර් සමාජ පන්දුවාර 50 කාන්තා ආරාධිත ක්‍රිකට් තරගාවලියද එම අරමුණ සාක්ෂාත් කර ගැනීම වෙනුවෙන් පවත්වනු ලබන තරගාවලියක්. ශ්‍රී ලංකා ක්‍රිකට් ජාතික ගමන් මග වැඩසටහන යටතේ වන මෙම තරගාවලි හරහා ශ්‍රී ලංකාවේ සෑම අස්සක් මුල්ලක් නෑරම සිටින දක්ෂ ක්‍රීඩක ක්‍රීඩිකාවන් සොයා ගැනීම දැන් අපහසු කරුණක් නොවෙයි. අන්න ඒ වගේ මුණ ගැසුණු ක්‍රීඩිකාවක් තමයි පියුමි වත්සලා කියන්නේ. පියුමි ක්‍රීඩා කරන්නේ පානදුර කාන්තා ක්‍රිකට් සමාජයට. ඇය මෙවර තරගාවලියේ පළමු ශතක ලාභිණිය බවට පත්වෙමින් බොහෝ දෙනාගේ අවධානය දිනා ගැනීමට සමත්ව සිටිනවා. ගාල්ල ක්‍රීඩා සමාජයට එරෙහිව ඇය එම ශතකය වාර්තා කිරීමට සමත් වුණේ නොවැම්බර් 27 වැනිදා. ඉතිං මේ ඇය වාර්තා කරන ලද පළමු ශතකය නොවන අතර ගිය වසරෙදිත් ඇය විසින් ශතකයක් වාර්තා කිරීමට සමත් වූවාය.
