15වන ලෝක කායවර්ධන සහ පිසික් ශූරතා තරගාවලිය නොවැම්බර් මස 5වනදා සිට 11වනදා දක්වා මාලදිවයිනේදී පැවැත්වෙයි. මෙවර තරගාවලිය වෙනුවෙන් ශ්‍රී ලංකාව නියෝජනය කරමින් ක්‍රීඩක ක්‍රීඩිකාවන් 7 දෙනෙකු සහභාගි වීමට නියමිතය.

2022 වසරේදී 13 වන ලෝක කායවර්ධන සහ පිසික් තරගාවලියේ සෙන්ටිමීටර් 175ට වැඩි කාණ්ඩයේ රන් පදක්කම දිනූ හර්ෂ පීරිස් මෙවර තරගාවලිය වෙනුවෙන් ද සහභාගි වෙයි.

පසුගිය වසරේ පැවති 14වන ලෝක කායවර්ධන හා පිසික් තරගාවලියේ කිලෝග්‍රෑම් 75ට වැඩි බරපන්තියේ කණිෂ්ඨ අංශයේ රිදී පදක්කම දිනූ තෙනුර ලක්ෂේන් සහ 13වන දකුණු ආසියානු කායවර්ධන සහ පිසික් තරගාවලියේ සෙන්ටිමීටර් 180ට් වැඩි කාණ්ඩයේ රිදී පදක්කම දිනූ ශනිල්ක පෙරේරා ද මෙවර ශ්‍රී ලංකා කණ්ඩායමට ඇතුළත් ය.

55වන ආසියානු කායවර්ධන සහ පිසික් තරගාවලියේ කාන්තා සෙන්ටිමීටර් 165ට වැඩි කාණ්ඩයේ රිදී පදක්කම් ලාභිනිය වූ හසිනි හේවගේ, 56වන ආසියානු කායවර්ධන සහ පිසික් ශූරතාවලියේ කාන්තා සෙන්ටිමීටර් 170ට වැඩි කාණ්ඩයේ සිව්වන ස්ථානය දිනූ නිසංසලා මධුමාලි සහ එම තරගාවලියේ ම සෙන්ටිමීටර් 165ට වැඩි කාණ්ඩයේ ලෝකඩ පදක්කම දිනූ මධුෂානි අමරසිංහ මෙවර ශ්‍රී ලංකා කණ්ඩායම නියෝජනය කරමින් තරග බිමට අවතීර්ණ වීමට නියමිතය.

එමෙන්ම වයස අවුරුදු 55-60 කාණ්ඩයේ මාස්ටර් ශූරතාවය වෙනුවෙන් ද මෙවර ශ්‍රී ලංකාව නියෝජනය කරමින් ක්‍රීඩකයෙකු සහභාගි වීමට නියමිතය. 56 හැවිරිදි වියෙහි පසුවන නිමල් වන්නිආරච්චි මෙවර තරගාවලිය වෙනුවෙන් එක් වන්නේ පළමු වරටයි.