[vc_row][vc_column][vc_column_text]ශ්‍රී ලංකා ක්‍රිකට් ආයතනය විසින් දෙවැනි වරටත් පවත්වනු ලබන ‘ලංකා ප්‍රිමියර් ලීග් 2021’ තරගාවලිය ලබන දෙසැම්බර් මස 05 වැනිදා ගිය වර ශූරයින් සහ අනුශූරයින් බවට පත් වුණු යාපනය සහ ගාල්ල අතර තරගයෙන් ආරම්භ වේ. එදින පස්වරු 3.00 ට පැවැත්වෙන තරගාවලියේ සමාරම්භක උළෙලින් පසු යාපනය සහ ගාල්ල කණ්ඩායම් ප.ව. 7.30 ට උරෙන් උර ගැටෙති.

ගිය වසරේ පැවැති තරගාවලියේ සියළුම තරග හම්බන්තොට මහින්ද රාජපක්ෂ ක්‍රීඩාංගණයේ පැවැත්වූ නමුත්,  දෙවැනි තරගාවලියේ මූලික වටයේ පැවැත්වෙන තරග 20 ම කොළඹ ආර්. ප්‍රේමදාස ක්‍රීඩාංගණයේදී පැවැත්වේ. මූලික වටයේ තරග වලින් අනතුරුව දෙසැම්බර් 23 වැනිදා පැවැත්වීමට නියමිත අවසන් මහ තරගය ඇතුළු කඩ ඉම් තරග වටයේ තරග හතර හම්බන්තොට මහින්ද රාජපක්ෂ ක්‍රීඩාංගණයේදී පැවැත්වීමට කටයුතු යොදා තිබේ.

පළමු තරගාවලියට සාපේක්ෂව දෙවැනි තරගාවලියේ ඇති විශේෂත්වය වන්නේ අවසන් කණ්ඩායම් 4 අතර තරග වටයට පිළිමළුන් පිටු දැකීමේ තරගයකට (Eliminator) අමතරව අවසන් මහ තරගයට සුදුසුකම් ලැබීම සඳහා තවත් සුදුසුකම් ලැබීමේ තරගයකට  ක්‍රීඩා කිරීමට කණ්ඩායම්වලට අවස්ථාව සලසා දීම වේ. මූලික වටයේ වැඩි දක්ෂතාවන් දක්වනු ලබන කණ්ඩායම්වලට අවසන් පූර්ව තරග වලදී සිදුවිය හැකි අසාධාරණය අවම කිරීම වෙනුවෙන් මෙම ක්‍රමය භාවිතා කරනු ලබයි.

ඒ අනුව ප්‍රසාද ලකුණු සටහනේ ඉදිරියෙන් පසුවන කණ්ඩායම් දෙක අතර පැවැත්වෙන සුදුසුකම් ලැබීමේ පළමු තරගයෙන් (Qualifier 1) ජයගනු ලබන කණ්ඩායම සෘජුවම අවසන් මහ තරගයට සුදුසුකම් ලබන නමුත් පරාජිතයින්ට තවත් වරක් අවසන් මහ තරගයට සුදුසුකම් ලැබීමට අවස්ථාවක් නිර්මාණය කර දීම මෙවර හඳුන්වාදෙන ක්‍රමය හරහා සිදුකෙරේ.

ඒ අනුව පළමු සුදුසුකම් ලැබීමේ තරගයෙන් (Qualifier 1) පරාජයට පත්වන කණ්ඩායමට නැවතත් අවසන් මහ තරග අවස්ථාව දිනා ගැනීමට නම් පිළිමළුන් පිටු දැකීමේ තරගයට හෙවත් Eliminator තරගයෙන් ජය ගනු ලබන කණ්ඩායමට එරෙහිව ජය වාර්තා කළ යුතු වනු ඇත. මෙම නව ක්‍රමවේදය මෙවර තරගාවලියට ඇතුළත් කිරීම නිසා අභිනව තරගාවලියේ පැවැති සමස්ථ තරග 23 ට වඩා එක් තරගයක් මෙවර තරගාවලියේදී වැඩිපුර පැවැත්වෙනු ඇත. මීට අමතරව තරගාවලියේ ඇති අනෙක් සුවිශේෂීතාව වන්නේ දෙසැම්බර් 23 වැනිදා පැවැත්වීමට නියමිත අවසන් මහ තරගයට පසු දිනද අතිරේක දිනයක් ලෙස නම් කර තිබීම වේ.

[/vc_column_text][/vc_column][/vc_row]