20-20 ක්‍රිකට් තරගවල කඩුලු 300 ලබා ගැනීමට වනිදු හසරංග ඊයේ සමත් වුණා.

ඒ, ‘අයි එල් ටී ටුවෙන්ටි’ තරගාවලියේ සාජා වොරියස් සහ ඩෙසර්ට් වයිපර්ස් කණ්ඩායම් අතර පැවති තරගයේදී. එම තරගයෙන්, ඩෙසර්ට් වයිපර්ස් කණ්ඩායම ජය ගත්තේ, කඩුලු 10 කින්.

තරගය ඩුබායි අන්තර් ජාතික ක්‍රිකට් ක්‍රීඩාංගනයේදී පැවැත්වුණා.

කාසියේ වාසිය හිමි කර ගත් ඩෙසර්ට් වයිපර්ස් කණ්ඩායමේ ආරාධනයෙන් ප්‍රථමයෙන් පන්දුවට පහර දුන් සාජා වොරියස් කණ්ඩායම පන්දුවාර 20 තුළ සියලුදෙනා දැවී රැස්කරගත හැකිවුයේ ලකුණු 91 ක් පමණයි.

ඉනිමේ වැඩිම ලකුණු ලාභියා වූ ජේසන් රෝයි නොදැවී ලකුණු 30 ක් රැස් කළා.

පන්දු යැවීමේදී, ඩෙසර්ට් වයිපර්ස් කණ්ඩායමේ මොහොමඩ් අමීර් කඩුලු 4 ක් සහ වනිඳු හසරංග කඩුලු 3 ක් බිඳහෙලුවා.

ඒ අනුව, වනිදු හසරංග 20-20 තරගවලදී කඩුලු 300 සීමාව සම්පුර්ණ කිරීමට ඊයේ සමත් වුණා.

ලකුණු 92 ක ජයග්‍රාහී ඉලක්කයක් හඹා ගිය ඩෙසර්ට් වයිපර් කණ්ඩායම පන්දුවාර 10 කදී කිසිවෙකු නොදැවී ලකුණු 95 ක් රැස් කරමින් තරගය ජය ගත්තා.

විශිෂ්ට පිතිහරඹයක නිතර වූ ෆකාර් සමාන් පන්දු 39 කදී ලකුණු 71 ක් ලබා ගැනීමට සමත්වුණා. ඊට 4 පහර 7 ක් සහ 6 පහර 4 ක් ඇතුළත්. ඇලෙක්ස් හේල්ස් ලකුණු 23 යි.