ඩයලොග් අන්තර් පාසල් රග්බි ලීග් තරගාවලිය ආරම්භ කරමින් පැවති පළමු තරගයේදී ප්‍රභල සාන්ත ජෝසප් විද්‍යාලය පරාජයට පත් කරමින් තියුණු ජයක් ලබන්නට මහනුවර විද්‍යාර්ථ විද්‍යාලයීය රග්බි කණ්ඩායම අද දිනයේදී සමත් විය.

තරගාවලියේ සමාරම්භක තරගය කොළඹ හැව්ලොක් ක්‍රීඩාංගණයේදී අද පස්වරුවේ පැවැත්වුණු අතර එහිදී ලකුණු 22ට 27ක් ලෙසින් ලකුණු 5ක තියුණු ජයක් හිමිකරගන්නට විද්‍යර්ථ ක්‍රීඩකයන්ට හැකියාව ලැබුණි

අතිශය තියුණු මුහුණුවරක් ගත් තරගයේ පළමු අර්ධය අවසානයේ දී දෙපිළම ලකුණු 17 බැගින් රැස්කරමින් සම තත්වයේ පසුවිය. නමුත් දෙවන අර්ධයේදී උත්සාහක දිනුමක් සහ එහි ප්‍රවර්ථනය සාර්ථක කරගනිමින් තවත් ලකුණු 7ක් ලකුණු පුවරුවේ සටහන් කරන්නට විද්‍යාර්ථ ක්‍රීඩකයන් සමත් විය.

නමුත් තරගය අත්නොහැරි සාන්ත ජෝසප් ක්‍රීඩකයන් ද උත්සාහක දිනුමක් සාර්ථක කරගනිමින් තවත් ලකුණු 5ක් රැස්කළේ යළිත් ලකුණු පුවරුව 22ක් දක්වා ඔසවා තබමිනි. විද්‍යාර්ථ ක්‍රීඩකයන්ට හිමිවූ දඩුවම් පහරක් සාර්ථක කරගන්නට සමත් වූ නිසාවෙන් තරගයේ නියමිත කාලය අවසන් වන විට ලකුණු 27ට 22ක් ලෙසින් ජයග්‍රහණය හිමිකරගැනීමට විද්‍යාර්ථ විද්‍යාලයීය කණ්ඩායම සමත් විය.